“কংগ্ৰেছৰ শাসনকালত অসম তথা উত্তৰ-পূৰ্বাঞ্চলৰ স্বাৰ্থজড়িত বিষয় লৈ কেন্দ্ৰীয় মন্ত্ৰী, বিষয়াৰ সাক্ষাৎ পাবলৈ দিল্লীত দিনৰ পাছত দিন বোন্দাপৰ দিবলগীয়া হৈছিল। তেতিয়াই দেখিবলৈ পাইছিলোঁ অসম তথা উত্তৰ-পূৰ্বাঞ্চলৰ জনগণৰ প্ৰতি কংগ্ৰেছৰ নেতা, পালিনেতাৰ অৱহেলা, অনীহা আৰু নিষ্পেষণৰ মনোভাৱ। কংগ্ৰেছ চৰকাৰৰ নিৰাশাজনক স্থিতি আৰু অপশাসনৰ বাবেই সমগ্ৰ বৰাক উপত্যকা দশক দশক ধৰি অৱহেলিত হৈ আছিল। কিন্তু তাৰ বিপৰীতে মাননীয় প্ৰধানমন্ত্ৰী নৰেন্দ্ৰ মোদী ডাঙৰীয়াৰ বলিষ্ঠ নেতৃত্বত বিজেপি চৰকাৰ শাসনলৈ অহাৰ পৰাই সমগ্ৰ উত্তৰ-পূবৰ সমান্তৰালকৈ বৰাক উপত্যকাইও উন্নয়নৰ নৱজাগৰণৰ সাক্ষী হৈছে। এতিয়া দিল্লী নিজেই উত্তৰ-পূৰ্বাঞ্চললৈ ধাৱমান হৈছে। মোদী ডাঙৰীয়াৰ নিৰ্দেশমৰ্মে প্ৰতিগৰাকী কেন্দ্ৰীয় মন্ত্ৰী, উচ্চপদস্থ বিষয়াই সঘনাই উত্তৰ-পূব ভাৰত ভ্ৰমণ কৰাটো এতিয়া বাধ্যতামূলক। আনকি মোদী ডাঙৰীয়াই নিজেই বিগত ১০ বছৰত ৬৪ বাৰতকৈও অধিক উত্তৰ-পূব ভাৰত ভ্ৰমণ কৰিছে। এয়া ভাৰতৰ ৰাজনৈতিক ইতিহাসতে বিৰল। দৃষ্টিভংগীৰ সলনি হোৱাৰ বাবেই এতিয়া অসম তথা উত্তৰ-পূৰ্বাঞ্চলে সকলো দিশতে সৰ্বাঙ্গীণ বিকাশৰ সাক্ষী হৈছে। বৰাক উপত্যকাতো উন্নয়নৰ নতুন দিগন্তৰ সূচনা হৈছে।” – কেন্দ্ৰীয় কেবিনেট মন্ত্ৰী তথা বিজেপিৰ নেতা সৰ্বানন্দ সোণোৱালে মঙলবাৰে শিলচৰত সাংসদ ৰাজদীপ ৰয়ৰ সৈতে ভাৰতীয় জনতা পাৰ্টিৰ জিলা কাৰ্যালয়ত এখন সংবাদ মেল সম্বোধন কৰি এই মন্তব্য প্ৰকাশ কৰে।
সোণোৱালে সংবাদ মেলত কয়, “মই মুখ্যমন্ত্ৰী হৈ থকাৰ কালছোৱাত বৰাক উপত্যকাৰ বাট-পথৰ দুৰ্গম অৱস্থাৰ ফলত হোৱা জ্বলন্ত সা-সমস্যাৰ সমাধান কৰিবলৈ অহোপুৰুষাৰ্থ কৰিছিলোঁ আৰু ইয়াৰ বাবে বিভিন্ন অভিলাষী পদক্ষেপ হাতত লৈছিলোঁ। কংগ্ৰেছৰ শাসনকালত বৰাকৰ যাতায়াত-যোগাযোগ একেবাৰে বিধ্বস্ত আছিল, মাত্ৰ কেই কিলোমিটাৰ দূৰত্ব অতিক্ৰম কৰিবলৈয়ে ঘণ্টাৰ পাছত ঘণ্টাৰ প্ৰয়োজন হৈছিল। বৰাকবাসীৰ এই মৰ্মবেদনা উপলব্ধি কৰিয়েই আমি ‘বৰাক-ব্ৰহ্মপুত্ৰ, পাহাৰ-ভৈয়াম’ৰ শ্ল’গানহে উন্নয়নৰ নতুন জাগৰণৰ সূচনা কৰিছিলোঁ আৰু বৰাকৰ পৰাই মোৰ কেবিনেটত গড়কাপ্তানী মন্ত্ৰী হিচাপে অন্তৰ্ভুক্ত কৰিছিলোঁ পৰিমল শুক্লবৈদ্য ডাঙৰীয়াক, যাতে বৰাকৰ যাতায়াত-যোগাযোগ ব্যৱস্থা উন্নত হয়। বৰাকৰ যাতায়াত-যোগাযোগ ব্যৱস্থা উন্নীতকৰণৰ বাবে মই মুখ্যমন্ত্ৰী হৈ থকাৰ কালছোৱাত প্ৰায় ৪,৫০০ কোটি টকা ব্যয়েৰে বিভিন্ন পথ প্ৰকল্প ৰূপায়ণ কৰা হৈছিল। এতিয়া বৰাক দোপতদোপে সকলো দিশতে আগুৱাই গৈছে। কংগ্ৰেছে জীয়াই ৰখা বৰাক উপত্যকা আৰু ব্ৰহ্মপুত্ৰ উপত্যকাৰ মাজৰ দূৰত্বও আমাৰ চৰকাৰৰ দিনতেই হ্ৰাস কৰা হৈছে – সেয়া লাগিলে মানসিক দূৰত্বই হওক বা পথ দূৰত্বই হওক। মাননীয় প্ৰধানমন্ত্ৰী নৰেন্দ্ৰ মোদী ডাঙৰীয়াৰ বলিষ্ঠ নেতৃত্বত ৫.৫০ লাখ কোটি টকাতকৈও অধিক পুঁজিৰে সমগ্ৰ উত্তৰ-পূব ভাৰতৰ যাতায়াত-যোগাযোগ ব্যৱস্থাৰ উন্নীতকৰণৰ বাবে বিভিন্ন অভিলাষী প্ৰকল্প ৰূপায়ণ কৰা হৈছে। ইয়াৰ ফলত বৰাকবাসীৰ দীৰ্ঘদিনীয়া আশা-আকাংক্ষা বাস্তবায়িত হৈছে। সেয়েহে বৰাকবাসীৰ আস্থা-বিশ্বাস, সঁহাৰি-সমৰ্থন ব্যাপক ৰূপত কেৱল বিজেপি মিত্ৰজোঁটৰ সৈতেহে আছে। মোৰ দৃঢ় বিশ্বাস- কৰ্মোদ্যমী, ৰাষ্ট্ৰীয় চেতনাৰে উদ্বুদ্ধ, সকলোৰে মাজত প্ৰিয় পৰিমল শুক্লবৈদ্য ডাঙৰীয়াই শিলচৰ লোকসভা সমষ্টিৰ পৰা বিপুল ভোটৰ ব্যৱধানত জয়ী হৈ লোকসভালৈ নিৰ্বাচিত হ’ব। এইবাৰ সমগ্ৰ দেশজুৰি বিজেপি নেতৃত্বাধীন এনডিএ-য়ে ৪০০ আসন পাৰ কৰাটো নিশ্চিত। অসমতো অতিকমেও ১২ খন আসন বিজেপি মিত্ৰজোঁটকেই উপহাৰ দিব
