নিউজ ডেস্ক:২৬ ডিচেম্বৰ:– হঠাৎ অসুস্থ বৰপেটাৰ সাংসদ ফণীভূষণ চৌধুৰী। প্ৰথমাৱস্থাত সাংসদগৰাকীক বঙাইগাঁও ল’ৱাৰ আসাম হাস্পতালত ভৰ্তি কৰোৱা হয়। তাৰ পিছত পৰৱৰ্তী সময়ত উন্নত চিকিৎসাৰ বাবে গুৱাহাটীলৈ প্ৰেৰণ কৰে। খবৰ অনুসৰি, বুধবাৰে সন্ধিয়াৰ ভাগত সাংসদগৰাকী অসুস্থ হৈ পৰে। সাংসদগৰাকীৰ স্বাস্থ্যৰ বাবে এতিয়া তেওঁৰ পৰিয়ালৰ লগতে সতীৰ্থ তথা অনুৰাগীসকল চিন্তিত হৈ পৰিছে।
শ্বাস-প্ৰশ্বাসজনিত সমস্যাৰ বাবে নিশা প্ৰায় ১২.৩০ মান বজাত সাংসদগৰাকীক হেলথ চিটি হাস্পতালত ভৰ্তি কৰোৱা হয়। হাস্পতালত ভৰ্তি হোৱাৰ কিছুসময় পাছতেই মন্ত্ৰী জয়ন্ত মল্ল বৰুৱাই হাস্পাতালত উপস্থিত হৈ সাংসদগৰাকীৰ স্বাস্থ্যৰ বুজ লয় ।সাংসদগৰাকী অসুস্থ হোৱা সন্দৰ্ভত মন্ত্ৰী জয়ন্ত মল্ল বৰুৱাই কয় যে, ফণীভূষণ চৌধুৰীয়ে উশাহৰ সমস্যাত ভোগা বাবে হাস্পাতালত ভৰ্তি কৰোৱা হৈছে। চিকিৎসকে জনাইছে যে বৰ্তমান তেওঁ সুস্থ অৱস্থাত আছে। হাৰ্টৰ সমস্যা তেওঁৰ আগৰ পৰাই আছে, পেছমেকাৰ লগোৱা আছে। কিন্তু এতিয়া সুস্থ আছে।
